
أسبوعين تكفي تتأسس في الأسئلة اللي تجي أكثر شي، بشرط 4 ساعات كل يوم وما يفوت يوم. خطتي لـ14 يوم: 10 أيام تأسيس بالاختصارات، يوم تدريب، يومين تسخين، وآخر يوم هو الليلة اللي قبل الاختبار. أشرح خطة 10 أيام بنفس الترتيب في الفيديو تحت، وهنا أوسعها لأسبوعين كاملين.
وش في الفيديو؟
في الفيديو أعطيك خطتي يوم بيوم بنفس ترتيب أيام مخيم القدرات: يوم صفر للبداية، 7 أيام اختصارات، وبعدها 3 أيام محاكاة. المقال هذا يمدها لأسبوعين: التأسيس 10 أيام بدل 7، ثم تدريب وتسخين. ولو وقتك 10 أيام بس، اتبع الفيديو كما هو.
هل أسبوعين تكفي؟
تكفي لهدف واحد: تمسك الاختصارات اللي تتكرر كثير وتنمسك بسرعة. ما تذاكر كل شي، واللي يبغى فوق 90 يحتاج وقت أطول، تقريباً 3 شهور. وما راح أكذب عليك: الخطة مو سهلة، تبغى منك قرابة 4 ساعات كل يوم، تدريب مكثف. أما لو درجتك في الخمسينات أو الستينات فهذي الخطة مكتوبة لك.
القواعد اليومية:
- كل يوم بدون نقاش، ولا يوم بدون مذاكرة.
- حل مع الفيديو، لا تتفرج بس.
- اعرف ليش غلطت في كل سؤال.
- مصدر واحد بس، تعدد المصادر يشتتك.
كم أذاكر باليوم وكيف أقسمه؟
4 ساعات في اليوم على 3 جلسات: تتعلم اختصار اليوم من الصفحات المخصصة له في كتاب الاختصارات، تتدرب عليه، وتختم بـ20 كلمة لفظية من القاموس اللفظي. وإذا حسبت بالدقائق في الفيديو: ربع ساعة شرح، ساعة وربع كمي، 40 دقيقة لفظي، ونص ساعة تختبر نفسك على اختصارات اليوم. قسمها بلوكات 25 دقيقة مذاكرة و5 دقائق راحة، ولا تذاكر بالساعات المتواصلة.
وش أذاكر كل يوم من الأسبوعين؟
| اليوم | الموضوع | الاختصار |
|---|---|---|
| صفر | نص ساعة: تعرف الخطة وتسوي اختبار تحديد مستوى | — |
| 1 | الاستيعاب المقروء | اختصار «احصد» |
| 2 | الحساب السريع | اختصار «قسمة الخطوط» |
| 3 | الرسم البياني والمتوسط والكسور العشرية | اختصار «جمع وطرح الكسور العشرية» |
| 4 | التناظر والكلمة الشاذة | اختصار «ابجد» |
| 5 | الكسور الاعتيادية | اختصار «حرب الكسور» |
| 6 | النسبة والسرعة | اختصار «مثلث النسبة» واختصار «مثلث السرعة» |
| 7 | إكمال الجمل والخطأ السياقي | اختصار «اشطح» |
| 8 | الأسس والجذور | اختصار «جمع وطرح الاسس» |
| 9 | المعادلات | اختصار «الحل بالتجريب» |
| 10 | المساحات والزوايا | من اختصارات الزوايا |
| 11 | تدريب | أسئلة الورقي السابقة |
| 12 و13 | تسخين | اختبار محاكي كامل كل يوم |
| 14 | الليلة اللي قبل الاختبار | مراجعة خفيفة |
كل اختصار في الجدول تلقاه مشروح في مكتبة الاختصارات. وللعشرة أيام: حل سؤال واحد على اختصار اليوم قبل ما تغلق الصفحة، يعني تتعلم وتطبق في نفس الجلسة.
وش أسوي في يوم 11 (التدريب)؟
التدريب يبدأ بعد ما تخلص التأسيس، مو قبله. خذ أسئلة الورقي السابقة بلوكات: نص ساعة حل، ثم ربع ساعة ترجع كل غلطة لاختصارها، ثم استراحة. وزع الكمي واللفظي بالنص تقريباً، واللفظي ما يقل. يوم التدريب 4 ساعات: 90 دقيقة كمي، 110 دقيقة لفظي مع الـ20 كلمة، و40 دقيقة استراحات. ولتدريب اللفظي استخدم الجمل اللفظية.
وش التسخين (يوم 12 و13)؟
التسخين هو اختبار محاكي كامل كل يوم على ورقة وقلم، بالوقت الحقيقي للاختبار: ساعتين و5 دقائق. بعد الاختبار كل غلطة ترجعها لاختصارها، وتراجع أساسيات أضعف موضوع. حتى لو باقي أسبوع، سخن.
المصدر: صفحة اختبار القدرات العامة، هيئة تقويم التعليم والتدريب — آخر تحقق 16 نوفمبر 2026
وش أسوي في يوم 14؟
الليلة اللي قبل الاختبار: مراجعة خفيفة ساعة بس، جهز هويتك والقلم وتأكد من مكان الاختبار، وبعدها نام 6 إلى 8 ساعات بدون قهوة ولا شاي. لا تسمع الكلام السلبي في القروبات وروح بدري. تفاصيل أكثر في ليلة اختبار القدرات.
الخطوة الجاية
شوف الفيديو، وسو اختبار تحديد المستوى اليوم، وابدأ اليوم 1. وإذا بقي لك أسبوع بس فالخطة المختصرة هي خطة 7 أيام؛ وإذا بقي شهر فتجد خطة 30 يوم. وللمبدأ العام تابع طريقة +90 وخارطة الطريق. تأكد من موعدك في مواعيد الورقي.
أسئلة شائعة
هل أسبوعين تكفي لمذاكرة القدرات؟
تكفي تتأسس في الأسئلة اللي تجي أكثر شي، بشرط 4 ساعات كل يوم وما يفوت يوم. ما أوعدك بدرجة، أوعدك بخطة واضحة.
وش أذاكر أول يوم؟
قبل اليوم الأول خذ نص ساعة تعرف فيها الخطة وتسوي اختبار تحديد مستوى، وبعدها تبدأ اختصارات اليوم الأول.
هل أبدأ بالأقسام أو الأسئلة المتكررة من أول يوم؟
لا. وأنت تتعلم الاختصار ما تفتح تجميعات ولا أقسام، خذها حبة حبة، والتدريب يجي بعد التأسيس.
وش أسوي لو باقي لي أقل من أسبوعين؟
لو باقي 10 أيام فالفيديو يعطيك خطة 10 أيام بنفس الترتيب: 7 أيام اختصارات وبعدها 3 أيام محاكاة.