كولي أمر، اختار الدورة اللي تقدر تتأكد منها بنفسك: خطة مكتوبة يوم بيوم، أرقام نتائج فيها درجة قبل ودرجة بعد، وشروط دفع واسترجاع مكتوبة في الصفحة. وبعدها السؤال الأهم: هل ولدك أو بنتك يقدر يلتزم فيها جنب المدرسة؟ الدورة الممتازة اللي ما تنفتح ما تسوى شي.
للإفصاح: أنا أحمد حجازي، مؤسس اختصارات القدرات، فخذ كلامي كرأي واحد وقارن بنفسك.
قبل ما تقارن: الاختبار في 4 أسطر
كثير من الضغط في البيت يجي من فهم غلط للاختبار، فخلني أختصره لك:
- ما فيه نجاح ورسوب. الاختبار معياري المرجع، يعني الدرجة تقول وين ولدك بين المختبرين. المتوسط 65، واللي يجيب 81 وفوق في أعلى 5%.
- عنده 5 فرص في المجموع، والدرجة صالحة 5 سنوات.
- الهيئة ترسل أعلى درجة لمنصة القبول بنفسها، فالمحاولة الضعيفة ما تمسح اللي بعدها.
- ساعتين و5 دقايق بدون آلة حاسبة، فالتدريب على الوقت جزء أساسي من التحضير.
المصدر: صفحة اختبار القدرات العامة، هيئة تقويم التعليم والتدريب — آخر تحقق 16 نوفمبر 2026
لو فهمت هذي الأربع، بتخفف عن ولدك نص الضغط قبل ما تدفع ريال.
وش تسأل الدورة؟ والجواب اللي يطمنك
اتصل أو اكتب للدورة واسأل هذي الأسئلة. الجواب نفسه يقول لك كثير:
| السؤال | جواب يطمنك | جواب يقلقك |
|---|---|---|
| وش يسوي ولدي كل يوم بالضبط؟ | جدول مكتوب لكل يوم بالمهام والوقت | «حسب وقته، المحتوى كله متاح» |
| كيف تقيسون تقدمه؟ | اختبار مستوى في البداية ومحاكاة كاملة بعدها | «بيحس بالفرق» |
| مين المدرب وكم جاب في القدرات؟ | درجة بتاريخ وإثبات تقدر تشوفه | شهادات عامة بدون درجة |
| من وين أرقام النتائج اللي تعلنونها؟ | درجات أرسلها المشتركين، مع العدد | «نسبة نجاح» بدون عدد ولا مصدر |
| وش يصير لو ما تحسن؟ | شرط مكتوب في صفحة الدورة | «تواصل معنا وبنشوف» |
| كم ساعة يحتاج في اليوم؟ | رقم واضح يناسب يوم الدراسة | «ساعة تكفي» لهدف عالي |
كيف تقرأ أرقام النتائج في الإعلانات؟
- «نسبة النجاح» كلمة ما لها معنى هنا، لأن الاختبار ما فيه نجاح ورسوب. لو شفتها، اسأل وش يقصدون.
- فرق بين أعلى درجة والوسيط. صورة واحدة لـ100 تقول إن شخص واحد جاب 100. الوسيط يقول وين وقف نص الناس.
- قبل وبعد أقوى من «بعد» لحالها. طالب بدأ بـ90 وطلع 95 غير طالب بدأ بـ65 وطلع 85. اطلب القصص اللي فيها الرقمين.
- العدد مهم. «طلابنا جابوا 95» من كم؟ خمسة؟ خمسمية؟
- مين أرسل الأرقام؟ اللي يرسلون درجاتهم غالباً اللي فرحوا فيها، فالرقم يعكس اللي أرسلوا مو كل اللي اشتركوا. الدورة الصادقة تقول لك هالشي بنفسها.
علامات الخطر
- وعد بدرجة معينة، أو «مضمون» بأي صيغة.
- كلام عن «أسئلة الاختبار الجاي» أو ملف فيه الأسئلة نفسها.
- ضغط «باقي مقعدين» و«العرض ينتهي الليلة» بدون تاريخ حقيقي.
- مدرب ما يوريك درجته.
- شروط الدفع والاسترجاع في رسالة واتساب مو في صفحة الدورة.
كم وقت يحتاج المراهق في اليوم؟
خطتي المجانية للشهر مبنية على 4 ساعات يومياً على 3 جلسات، ثلثين للكمي وثلث للفظي. هذا يمشي في الإجازة أو لطالب يومه فاضي. مع الدوام، الأحسن تاخذ خطة اليوم على يومين وتبدأ أبكر، بدل ما تحط ولدك تحت ضغط 4 ساعات بعد مدرسة كاملة. اللي يكسر الطالب مو قلة الساعات، هو إنه يحس إنه متأخر كل يوم.
كيف تدعمه بدون ما تضغط عليه؟
- اسأله عن الخطة، مو عن الدرجة. «خلصت مهام اليوم؟» أخف بكثير من «كم بتجيب؟».
- احم نومه. السهر قبل الاختبار يضيع اللي ذاكره.
- لا تقارنه بأحد. ولد عمه اللي جاب 95 بدأ من مكان ثاني.
- احتفل بالمحاكاة اللي تحسنت، حتى لو لسه بعيد عن الهدف.
- ذكره إن عنده فرص. أول محاولة مو حكم نهائي.
وش الخيارات قدامك كولي أمر؟
- مدرس خصوصي في البيت: تشوف ولدك يذاكر بعينك. الكلفة عالية لو احتاج أسابيع، والجودة كلها على شخص واحد.
- مركز حضوري: فيه جدول وحضور ومكان مخصص. فيه مشوار يومي، والسرعة وحدة للكل.
- برنامج أونلاين بخطة يومية: يقدر يتابعه من البيت ويرجع للتسجيل. اسأل هل تقدر أنت تعرف وين وصل.
- المصادر المجانية: ما تكلفك شي، وكثير يرفعون درجاتهم فيها. تحتاج ولد منضبط أو أحد يتابعه.
ولو تبي مقارنة أوسع بالمعايير، كتبتها في كيف تختار دورة قدرات.
وين يجي «مخيم القدرات» من هذا؟
مخيم القدرات خطة 30 يوم مكتوبة يوم بيوم من المستوى الأول، و12 ورشة لايف معي تتسجل لو صادفت وقت المدرسة، وتدريب على أكثر من 1,500 من الأسئلة الأكثر تكرار، و«الخوارزمي» اللي يدربه حسب مستواه، واختبارات محاكية كاملة. أونلاين بالكامل، والجمهور مختلط، والبنت تحضر بدون كاميرا وترجع للتسجيلات، وما فيه مدرّسة خاصة بالبنات. السعر حالياً 399 ريال وتشوفه محدث في صفحة المخيم.
ومن الدرجات اللي أرسلها لي المشتركين بأنفسهم: 538 شخص، الوسيط فيهم 89، و267 منهم 90 وفوق. واللي أرسلوا أول درجة وآخر درجة كانوا 146، ووسيط الارتفاع عندهم 15.5 درجة. هذا مو كل اللي اشتركوا، هذول اللي قرروا يرسلون، وأقولها لك عشان تقرأ الرقم صح. تقدر تسمع تجاربهم في تجارب 90 وفوق ومن 70 أو أقل.
درجتي كطالب كانت 97 بمذاكرة شهر، وبعدها لما صرت مدرس جبت 100 مرتين، ورقي ومحوسب في ديسمبر 2024، والطريقة في كيف جبت 100.
متى ما أنصحك بالمخيم؟
- لو ولدك ما قرر يختبر أصلاً: لا تدفع عنه. خله يجرب الخطة المجانية أسبوع ويشوف.
- لو يحتاج التحصيلي الحين أكثر: المخيم للقدرات فقط.
- لو تبي تشوفه جالس في فصل: المخيم أونلاين، فمركز حضوري يناسبكم أكثر.
أسهل بداية: خل ولدك أو بنتك يسوي الخطة الشخصية ببلاش، وتشوفون مع بعض من وين يبدأ.
أسئلة شائعة
كم ساعة يذاكر ولدي للقدرات في اليوم؟
خطتي المجانية لشهر تحتاج 4 ساعات يومياً على 3 جلسات. لو المدرسة ما تسمح، وزع خطة اليوم على يومين وابدأ أبكر بدل ما تضغطه.
لو ولدي جاب درجة ضعيفة، هل تنحسب عليه؟
عنده 5 فرص في المجموع، والدرجة صالحة 5 سنوات، والهيئة ترسل أعلى درجة لمنصة القبول تلقائياً. فالمحاولة الضعيفة ما تمسح اللي بعدها.
إعلان دورة يقول نسبة النجاح 99%، هل أصدقه؟
اختبار القدرات ما فيه نجاح ورسوب أصلاً حسب الهيئة، الدرجة تعكس مكان ولدك بين المختبرين. فاسأل: نجاح بأي معنى؟ ومن كم شخص؟
هل الدورة الأونلاين تناسب بنتي؟
تناسبها لو الدورة تسمح بالحضور بدون كاميرا وتسجل الدروس. شيك على هذي النقطتين قبل التسجيل، واسأل هل الجمهور مختلط أو منفصل حسب اللي يريحكم.
متى أسجل ولدي في دورة قدرات؟
بعد ما تعرف موعد اختباره، وتختار دورة تخلص قبله بأسبوع على الأقل. والأفضل يبدأ باختبار مستوى قصير يحدد من وين يبدأ.