مخيم القدرات

مقارنات واختيار الدورة

دورة قدرات في أسبوع؟ وش تسوي بدالها في 7 أيام

باقي 7 أيام على القدرات؟ لا تشتري دورة 30 يوم. اللي يرفعك: اختبار كامل، دفتر أخطاء، أهم الاختصارات، ونوم. خطة فرز للأسبوع الأخير.

في أسبوع واحد ما في دورة بتبني لك أساس، فلا تشتري دورة طولها 30 يوم وأنت باقي لك 7. اللي يرفعك هالأسبوع أربع أشياء: اختبار كامل بالوقت يكشف وين تخسر، ودفتر أخطاء ترجع له كل يوم، وأهم الاختصارات لأكثر الأنواع تكرار، ونوم كافي. وش تركز عليه منها يحدده مستواك اليوم ونوع اختبارك.

للإفصاح: أنا أحمد حجازي، مؤسس اختصارات القدرات، فخذ كلامي كرأي واحد وقارن بنفسك.

أول شي: تأكد إن عندك أسبوع فعلاً

ناس كثير يبحثون «دورة في أسبوع» وهم عندهم أكثر. الورقي هالموسم من 10 إلى 14 ديسمبر 2026، فلو تقرأ هذا في نص نوفمبر وأنت ورقي، عندك أكثر من 3 أسابيع، وصفحة دورة قدرات قبل الورقي 1448 أنسب لك. أما المحوسب فمتاح طول السنة، فالأسبوع الضيق غالباً يكون حجز محوسب قريب.

وتذكر إن الحجز مو قدر: تقدر تعدله أو تلغيه إلى قبل المحوسب بـ48 ساعة وقبل الورقي بـ72 ساعة. وعندك 5 فرص في المجموع، والهيئة ترسل أعلى درجة لمنصة قبول تلقائياً.

المصدر: صفحة اختبار القدرات العامة، هيئة تقويم التعليم والتدريب — آخر تحقق 16 نوفمبر 2026

ليش ما أنصحك تشتري دورة كاملة الحين

الدورة الطويلة ترتيبها منطقي: تأسيس، ثم تدريب، ثم محاكاة. لو دخلتها قبل اختبارك بسبع أيام، بتختبر وأنت لسه في مرحلة التأسيس، وبتكون دفعت على 23 يوم ما استفدت منها. هذا مو كلام ضد الدورات، هذا حساب أيام. الدورة تصير منطقية بعد النتيجة، لو قررت تعيد.

5 شروط لأي شي تدفع عليه هالأسبوع

  1. يشتغل من اليوم. مو «الدفعة تبدأ الأحد الجاي».
  2. فيه اختبار كامل بالوقت، ونتيجته مفصلة حسب نوع السؤال. رقم إجمالي بس ما يقول لك وش تذاكر بكرة.
  3. يقدر يحدد لك 3 أنواع أسئلة بس تشتغل عليها، بدل قائمة طويلة.
  4. ما يطلب منك أكثر من 5 ساعات في اليوم. الأسبوع الأخير مو وقت ترهق نفسك.
  5. مجاني أو رخيص. لأنك بتستخدمه أسبوع، مو شهر.

مخيمي نفسه يطيح في الشرط الأول والخامس لهالموقف، فلا تشترك فيه عشان أسبوع.

خطة الفرز: 7 أيام

اليوموش تسويالهدف منه
1اختبار كامل بالوقت الحقيقي، وبعده دفتر الأخطاءتعرف وين تنزف درجات
2أكثر نوع كمي غلطت فيه: اختصاره، وبعده 40 سؤال منهتسد أكبر ثغرة في الكمي
3أكثر نوع لفظي غلطت فيه، ومعه 30 دقيقة كلماتتسد أكبر ثغرة في اللفظي
4اختبار كامل ثاني، وقارن دفتره بدفتر اليوم الأولتشوف هل اللي اشتغلت عليه تحرك
5النوع الثالث في قائمتك، وإعادة حل كل أسئلة الدفترتثبت ما تعلمته
6أقسام قصيرة بالوقت، ووقف بدريتسخين بدون إرهاق
7ساعة على الدفتر، تجهيز الهوية والقلم، نومتدخل صاحي

الخطة يوم بيوم بتفاصيل أكثر في خطة 7 أيام، والليلة الأخيرة لحالها في ليلة اختبار القدرات.

دفتر الأخطاء: الأداة الوحيدة اللي أصر عليها

أي ورقة تكفي، بأربع خانات: السؤال، ونوعه، وليش غلطت، والطريقة الصح. وأسباب الغلط غالباً أربعة: ما عرفت الطريقة، أو ضاع الوقت، أو كلمة ما تعرف معناها، أو قريت السؤال غلط. لما يتكرر نفس السبب ثلاث مرات، هذا درس بكرة. وفي آخر يومين ما تفتح شي غير الدفتر، لأنه خلاصة أسبوعك كله.

مثال: لو لقيت خمس غلطات في الاستيعاب كلها سببها إنك قريت الخيارات قبل السؤال، هذا مو نقص معلومات، هذا ترتيب قراءة. تصلحه في جلسة وحدة، وترجع لك درجات في أيام، بدون ما تفتح باب جديد.

وش الخيارات الواقعية في 7 أيام؟

ومخيم القدرات؟ بعد النتيجة، مو قبلها

المخيم خطة 30 يوم من ليفل 1، فمكانه الطبيعي بعد اختبارك لو قررت تعيد: شهر يبني الطريقة صح، وبعده «مسار الـ100» لثلاث شهور. التفاصيل في صفحة المخيم.

وليش أقول إن المحاولة الأولى مو نهاية القصة؟ من الدرجات اللي أرسلها لي المشتركين بأنفسهم، 42 قالوا إنهم اختبروا 3 مرات أو أكثر، والوسيط عندهم 92.5. وأنا نفسي أول محاولة لي كانت في الثانوي، ودرجتي كطالب كانت 97 بمذاكرة شهر، وبعدها لما صرت مدرس جبت 100 مرتين (ورقي ومحوسب، ديسمبر 2024) بعد قرابة شهرين مذاكرة، والقصة في كيف جبت 100.

لمين هالصفحة مو له؟

ابدأ اليوم الأول الحين: احجز ساعتين و5 دقايق، وحل اختبار كامل، واكتب أول صفحة في دفترك.

أسئلة شائعة

هل في دورة قدرات تنفع في أسبوع؟

دورة تأسيس كاملة لا، لأنها ما بتلحق تبني شي. اللي ينفع في أسبوع: محاكاة بالوقت، ومراجعة أخطاء، ودرس مركز على أهم الاختصارات.

وش أسوي أول يوم لو باقي أسبوع على القدرات؟

اختبار كامل بالوقت الحقيقي، ساعتين و5 دقايق بدون آلة حاسبة، وبعده تكتب كل غلطة وسببها. هالورقة تحدد لك وش تذاكر باقي الأسبوع.

أأجل اختبار القدرات ولا أدخله وأنا مو جاهز؟

تقدر تعدل الحجز أو تلغيه إلى قبل المحوسب بـ48 ساعة وقبل الورقي بـ72 ساعة. لو مستواك بعيد عن هدفك والقبول ما يستعجلك، التأجيل أحسن من حرق فرصة من الخمس.

كم ساعة أذاكر في الأسبوع الأخير؟

4 إلى 5 ساعات في أول خمس أيام، وخفف آخر يومين. النوم الكافي آخر ليلتين يرجع لك درجات أكثر من ساعات السهر.

هل أتعلم شي جديد في آخر أسبوع؟

اختصار أو اثنين لأكثر نوع غلطت فيه في المحاكاة، وبس. أي باب جديد كلياً خله لمحاولة ثانية.

اقرأ أيضاً